WhatsApp foydalanuvchilar uchun xabar almashish va qo‘ng‘iroqlar sifatini oshirishga mo‘ljallangan chatlar, qo‘ng‘iroqlar va kanallar uchun bir qator yangilanishlarni e’lon qildi.
Bu orqali ilova Telegram va Discord kabi mashhur xizmatlar bilan raqobatlashishni davom ettirmoqda.
Yangiliklardan biri “Onlayn” ko‘rsatkichi bo‘lib, u guruh chatining yuqori qismida paydo bo‘ladi va ayni paytda chatda qancha odam borligini ko‘rsatadi.
Yana bir yangi guruh chati funksiyasi foydalanuvchiga ma’lum bildirishnomalarni ajratib olish imkonini beradi. Endi yaqinda qo‘shilgan “Bildirishnomalar uchun” sozlamasidan foydalanib, “@” belgilangan xabarlar, javoblar va saqlangan kontaktlardan kelgan xabarlar uchun bildirishnomalarni cheklash uchun “Asosiy” yoki barcha bildirishnomalarni olish uchun “Hammasi” bandini tanlash mumkin.
Boshqa bir funksiya iPhone’da hujjatlarni skanerlash va yuborish imkoniyatini taqdim etadi. Undan foydalanish uchun foydalanuvchilar biriktirma parametrlaridan “hujjatni skanerlash” bandini tanlab, so‘ngra hujjatni skanerlash, qirqish va saqlash bo‘yicha ko‘rsatmalarga amal qilishlari kerak.
Bundan tashqari, iPhone foydalanuvchilari WhatsApp’ni standart xabar almashish va qo‘ng‘iroq qilish ilovasi sifatida o‘rnatishlari mumkin.
Shuningdek, iPhone foydalanuvchilari endi video qo‘ng‘iroqlar paytida imo-ishoralar yordamida tasvirni kattalashtirishi mumkin.
WhatsApp video qo‘ng‘iroqlarni yanada ishonchliroq va sifatliroq qilish uchun o‘z texnologiyasini yangilaganini ma’lum qilmoqda.
Bu esa uzilgan qo‘ng‘iroqlar va video tiqilinishlar sonining kamayishiga olib kelishi kerak. Ilovaning o‘tkazuvchanlik qobiliyatini yaxshilangan aniqlash tizimi HD sifatidagi video qo‘ng‘iroqlarni ko‘proq amalga oshirish imkonini berishi lozim.
Messenjer bir muddatdan beri foydalanuvchilarga guruh chatlarida tadbirlar yaratish imkonini bergan bo‘lsa-da, endi u shaxsiy suhbatlarda ham tadbirlar yaratish imkoniyatini joriy etmoqda.
Bundan tashqari, tadbirlar funksiyasi “ehtimol” deb javob berish, qo‘shimcha odam taklif qilish, tugash sanasi va vaqtini qo‘shish hamda tadbirlarni topishni osonlashtirish uchun ularni mahkamlash imkoniyati bilan yangilanmoqda.
Shuningdek, endi joriy shaxsiy qo‘ng‘iroqqa kimnidir qo‘shish uchun ekranning yuqori qismidagi qo‘ng‘iroq belgisini bosib, “Qo‘ng‘iroqqa qo‘shish” bandini tanlashingiz mumkin.
Kanallar ham uchta yangilanishga ega bo‘ladi. Endi administratorlar qisqa videolarni yozib olib, obunachilariga ulashishlari hamda o‘z kanallariga to‘g‘ridan-to‘g‘ri havola qiluvchi noyob QR-kodlarni almashishlari mumkin.
Bundan tashqari, yo‘lda bo‘lganingizda va alohida xabarlarni o‘qiy olmaganingizda voqealardan xabardor bo‘lish uchun kanallardagi ovozli xabar yangilanishlarining yozma xulosalarini olish imkoniyati paydo bo‘ldi.
Avvalroq Spot WhatsApp jamoasi foydalanuvchilarning surat va videolarini kim va qanday saqlayotganini nazorat qilish imkonini beruvchi funksiyalar ustida ish olib borayotgani haqida yozgandi.
