AQSh Xitoydan import qilinadigan tovarlarga bojlarni 245%gacha oshirishi mumkin, deya xabar berdi Oq uy matbuot xizmati.
Pekin AQShning tariflarni oshirishiga javoban choralar ko‘rdi, shu sababli unga “AQShga import uchun 245%lik bojlar tahdid solmoqda”, deyiladi prezident Donald Tramp ma’muriyati bayonotida.
Vashington “o‘zaro” bojlarni joriy etishni e’lon qilgandan so‘ng, 75 dan ortiq davlat yangi savdo kelishuvlarini muhokama qilish uchun AQShga murojaat qildi, natijada bojlarni joriy etish to‘xtatildi, deya ta’kidladi Oq uy.
Bundan tashqari, prezident ma’muriyatining xuddi shu bayonotida ta’kidlanishicha, Tramp 15-aprel kuni AQShning eng muhim foydali qazilmalar va ulardan olingan mahsulotlarning qayta ishlangan turlarini import qilishga qaramligi bilan bog‘liq tekshiruv boshlash to‘g‘risidagi farmonni imzolagan.
Xabarda aytilishicha, ushbu tekshiruv jarayonida ta’minot zanjirlaridagi zaif tomonlar, tashqi bozorlardagi nomutanosibliklarning iqtisodiy oqibatlari hamda mazkur muhim xom ashyolarning ishonchli va barqaror ichki ta’minotini ta’minlash uchun ehtimoliy savdo himoyasi choralari baholanadi.
Aprel oyida Tramp Xitoydan keltirilayotgan mahsulotlarga 125%gacha boj belgiladi. Oq uy ma’lum qilishicha, ilgari amalda bo‘lgan yig‘imlarni hisobga olgan holda, Xitoy uchun umumiy tariflar 145%gacha ko‘tarildi.
Bunga javoban Pekin 12-apreldan boshlab AQShdan keltirilayotgan mahsulotlarga bojlarni 125%gacha oshirdi. Xitoy Davlat kengashining tariflar qo‘mitasi ta’kidlashicha, hozirgi tarif darajasida bozor endi Xitoyga yetkazib berilayotgan Amerika tovarlarini qabul qila olmaydi. Shu sababli, AQSh Xitoydan kelayotgan mahsulotlarga tariflarni oshirishda davom etsa ham, Pekin bunga javob qaytarmaydi.
Bundan tashqari, Xitoy Gollivud filmlari importini cheklashini ma’lum qildi. Pekin avtomobilsozlik va aerokosmik sanoatda, shuningdek, yarimo‘tkazgichlar ishlab chiqarishda “muhim ahamiyatga ega” bo‘lgan noyob yer minerallari va magnitlar eksportini to‘xtatdi, deya xabar berdi The New York Times.
Shuningdek, Pekin Xitoy aviakompaniyalariga Boeing samolyotlarining yangi yetkazib berilishini qabul qilishni taqiqladi, deb yozdi Bloomberg.
WSJ nashrining xabar berishicha, Tramp 70 dan ortiq davlatni import bojlarini bekor qilish evaziga Xitoy iqtisodiyotini izolyatsiya qilishga ishontirmoqchi.
Bojxona tariflari bo‘yicha muzokaralarda AQSh boshqa davlatlardan Xitoy iqtisodiyotiga jalb qilinishiga qarab, mamlakatdan tovarlar olib kirish va tranzitini, shuningdek, Xitoy kompaniyalarini joylashtirishni taqiqlashni so‘raydi, deb yozadi gazeta xabardor manbalarga tayanib.
